محکمہ تعلیم میں کلاس فور کی بھرتیوں کی منسوخی۔ متاثرہ امیدواروں نے پشاور ہائیکورٹ میں رٹ پٹیشن دائر کردی

ایبٹ آباد: محکمہ تعلیم میں کلاس فور کی بھرتیوں کی منسوخی۔ متاثرہ امیدواروں نے پشاور ہائیکورٹ میں رٹ پٹیشن دائر کردی۔ تفصیلات کے مطابق ای ڈی او ایجوکیشن ریاض سواتی کی جانب سے اراکین صوبائی اسمبلی کی مرضی کیخلاف میرٹ پر بھرتیاں کرنے پر اراکین اسمبلی نے اس مسئلے کو ذاتی اناء کا مسئلہ بنا لیا ہے۔ اراکین اسمبلی کی جانب سے صوبائی اسمبلی میں واویلا اور ای ڈی او کے متعدد مرتبہ تبادلہ کروانے اور پھر عدالت عالیہ کی جانب سے ان احکامات کی منسوخی نے اراکین اسمبلی کی کارکردگی پر سوالیہ نشان لگادیا ہے۔ چند روز قبل ای ڈی او ایجوکیشن کی جانب سے سو فیصد میرٹ پر بھرتی ہونیوالے 74 کلاس فور ملازمین کی بھرتیوں کو ڈی سی او ایبٹ آباد نے سیاسی دباؤ پر منسوخ کرتے ہوئے ای ڈی او ایجوکیشن ریاض سواتی کو جبری رخصت پر بھیج دیا ہے۔ جس کے بعد ارباب ظفر نے قائمقام ای ڈی او کا چارج سنبھال لیا ہے۔ اراکین اسمبلی کے آدمیوں کی بھرتی کے لئے راہ ہموار کی جارہی ہے۔ جس پر متاثرہ74 امیدواروں نے سابق ڈپٹی ایڈوکیٹ جنرل کے پیکے، و سابق صدر ہائیکورٹ بار ایبٹ آباد ملک منظور حسین ایڈوکیٹ کی وساطت سے پشاور ہائیکورٹ میں رٹ پٹیشن دائر کردی ہے۔ جسے عدالت عالیہ نے ابتدائی سماعت کے بعد منظور کرلیا ہے۔ ہائیکورٹ میں رٹ پٹیشن دائر کرنے کے موقع پر تمام متاثرہ لوگ موجود تھے۔ صحافیوں سے بات چیت کے دوران متاثرہ نوجوانوں نے کہا کہ اراکین اسمبلی یہ مت بھولیں کہ وہ ہمارے ووٹوں سے منتخب ہوئے ہیں۔ اللہ تعالیٰ کی لاٹھی بے آواز ہے۔ الیکشن بھی قریب ہیں۔ اگر موجودہ اراکین اسمبلی نے اپنی روش تبدیل نہ کی تو آئندہ یہ لوگ اپنے گھروں میں بیٹھ کر سیاست کریں گے۔ ہم ان لوگوں کو اسمبلیوں میں ووٹ دے کر کسی صورت نہیں بھیجیں گے۔

گورنمنٹ بوائز پرائمری سکول بگنوتر کے ٹیچر گھر بیٹھے تنخواہیں وصول کرنے لگے

ایبٹ آباد:گورنمنٹ بوائز پرائمری سکول بگنوتر کے ٹیچر گھر بیٹھے تنخواہیں وصول کرنے لگے۔ علاقے کے بچے گرلز پرائمری سکول میں تعلیم حاصل کرنے پر مجبور۔ شرپسند عناصر نے معصوم بچوں کو گرلز پرائمری سکول میں لڑکوں کو داخلہ دینے پر سکول کی انچارج کیخلاف منفی پروپیگنڈہ شروع کردیا۔ تفصیلات کے مطابق گورنمنٹ بوائز پرائمری سکول بگنوتر کی حالت یہ ہے کہ اس سکول کے ٹیچر گھر بیٹھے تنخواہیں وصول کررہے ہیں۔ سکول میں تعینات سعید نامی اکلوتا ٹیچر مہینے میں صرف ایک مرتبہ سکول آتا ہے۔ جبکہ سکول میں تعینات چوکیدار بچوں کو پڑھاتا ہے۔ جس کی وجہ سے علاقے کے بچے زیور تعلیم سے محروم ہیں۔ مقامی لوگوں نے محکمہ تعلیم کے ذمہ داروں کو اس صورتحال کے بارے میں کافی مرتبہ آگاہ کیا لیکن گورنمنٹ بوائز پرائمری سکول میں ٹیچروں کی تعیناتی اور حاضری کو یقینی نہ بنایا جا سکا ۔ جس کی وجہ سے علاقے کے بچوں کو ان کے والدین نے گورنمنٹ گرلز پرائمری سکول بگنوتر میں داخل کروانا شروع کردیاہے۔ بگنوتر کے 100 سے زائد بچے اس وقت گورنمنٹ گرلز پرائمری سکول میں تعلیم حاصل کر رہے ہیں۔ مقامی لوگوں کے مطابق گورنمنٹ گرلز پرائمری سکول بگنوتر کی ٹیچرز روزانہ سکول میں آتی ہیں اور بچوں کو محنت کے ساتھ پڑھاتی ہیں۔ جس کی وجہ سے پورے بگنوتر میں اس سکول کی ٹیچرز کا چرچا ہے۔ تاہم علاقے میں موجود بعض شرپسند عناصر کو یہ چیز پسند نہیں آئی۔ اور انہوں نے گورنمنٹ گرلز پرائمری سکول کی انچارج کیخلاف منفی پروپیگنڈہ شروع کررکھا ہے۔ بگنوتر کے رہائشیوؤں نے ای ڈی او ایجوکیشن اور ڈی سی او ایبٹ آباد سے مطالبہ کیا ہے کہ گورنمنٹ بوائز پرائمری بگنوتر کے تمام ٹیچرز کو کلاس فور سمیت فوری طور پر تبدیل کیا جائے۔ اور اس سکول میں فرض شناس اساتذہ کو تعینات کیا جائے۔